Koekedoor

Koekedoor skop dramaties af met 'n kombuis wat gons van glitzy gebak-persoonlikhede, gebak-ghoeroes, koekontwerpers, meesterbakkers en die pronkgebak wat hul handtekening dra.

Oggendgebak word ingespan om die gesin tafel toe te lok vir ontbyt. Daar word ook gekyk na klassieke eetgoed uit die bakwêreld - van vinnige meelmengsels tot suurdeeggebak.

Daar is koekies met die mooiste name soos anyskoekies, soentjies, konfythartjies en die kroonprinses van die koekblik: die outydse soetkoekie. Ons Koekedore bak soetkoekies.

Koekedoor laat blom die tradisie van die teetuin en fyn tuinpartytjies. Die tema is fyntuin en Switserse rolkoek, mini-randkoeke en Petit Fours kom maak 'n draai.

Vir Koekedoor beteken basaar 'n grootkoekfees. Hierdie spogkoeke het twee kante: die sonde-kant van suiker-oordaad, en 'n barmhartige kant, want elke sent gaan vir liefdadigheid.

Net soos mense is elke brood wat jy bak uniek, omdat jy met 'n lewendige ding werk. Om van net drie dinge - meel, gis en water - brood te maak, bly 'n bak-wonderwerk.

The Koekedoor contestants bake birthday cakes inspired by the well-loved characters from television programs Tjiff en Tjaff, Pinocchio, Heidi, Liewe Heksie, Haas Das and Wielie Walie.

Die Koekedore maak koeke wat hulde bring aan tradisionele gebakte poedings. Die fyngebak-rondte daag die bakkers se choux-tegnieke uit. Die bakdag eindig met 'n koekvertolking van trifle.

Die goue draad deur hierdie episode is vla - die eiervla, melkpap en bakkersvla wat in ons eie koskultuur en vir almal wat vir tuisnywerhede bak, onmisbaar is.

Hierdie week vind ons Koekedore inspirasie in vlegwerk en draaiwerk: koeksisters en knoop- en vlegwerk met korsdeeg is vandag se uitdaging!

Deur die eeue het fynbakkers vir die adellikes koeke gemaak vol drama en 'n sin vir teater. Vandag is daar 'n hernieude fassinasie met verskuilde boodskappe in soetgebak.

Eierwit en eiergeel is die hoofkarakters op die Koekedoor-verhoog. Eierwit bring 'n veerligte karakter na poedings en koek, terwyl eiergeel se rol as verdikkingsmiddel gevier word.

Ons Koekedore se finale uitdaging: 'n fabelagtige, kontemporêre 21ste eeuse troukoek wat alles van die liefde vertel.